ნამუშევრის სახელი არის “5” და აქვეა მოცემული ქართველი ფილოსოფოსის, მერაბ მამარდაშვილის გამონათქვამი:
“ერთია ხალხის მასა, მეორეა – ბრბო.”
“ბრბო იმ ხალხის მასას წარმოადგენს, რომელიც ტრადიციას განზე გაუდგა, წარმომავლობასთან ერთიანი კავშირი დაარღვია და როგორც ჩემს საყვარელ ლეჩხუმში ამბობენ: “მათ განსჯა არ აქვთ” — ის, ვინც ვერ განსჯის, ბრბოა.”
ნამუშევრის სქემა აგებულია იმ რიცხვებზე (ისინი გამომდინარეობს წინამორბედი ნამუშევრებიდან), რომლებიც “სიცოცხლის ხის” სტრუქტურას ქმნიან. ნამუშევარში მოცემული ვიდეო ადამიანის სიცოცხლის ციკლს წარმოადგენს. მეტაფორული ზეცა 6 ფიგურას შეიცავს, რაც თავის მხრივ, იმ გეომეტრიულ ფიგურას ქმნის, რომელიც მიწაზე ირეკლება და ასევე 6 სხვადასხვა მოძრავ ფიგურას წარმოქმნის — 6 ცალკეული პერსონაჟი, რომლებსაც სხვადასხვა ხედვის წერტილიდან განსხვავებული ვიზუალური ფორმა აქვთ. ნამუშევარი პანდემიის დროს შეიქმნა და მაყურებელი ხშირად დაინახავს მომტირალე თვალს, ძაღლს, ბალერინას ფეხს, ყვავილს… ისინი მაშინ ცოცხლდებიან, როცა მაყურებელი სივრცეში შეაბიჯებს. ეს ფორმები თავად ხდებიან მაყურებლები და სივრცის განუყრელ ნაწილებად იქცევიან: ისინი მაყურებელთან ერთად აკვირდებიან ვიდეოს ან კითხულობენ კონცეფციას. ეს ფორმები იმ მთლიანობის განცდას ქმნიან, რომელიც კედელზე განთავსებულ კონცეფციის აღწერაშიც ირეკლება — კონცეფცია კი თავისთავად ნამუშევარს წარმოადგენს. ვიდეოპროექცია, რომელიც კონცეფციის ქვეშ, “სიცოცხლის ხის” შუაგულშია განთავსებული, თვალს მოგვაგონებს.
კვარცხლბეკზე განთავსებული ბოტასები არტისტის მთავარ აქსესუარს წარმოადგენს. ისინი მისთვის სიცოცხლის სიმბოლოა და უკავშირდება კოსმიურ პერსონაჟებს (მაგალითად, ჯორჯ ლუკასის ფილმიდან “ვასრსკვლავური ომები”). ეს პერსონაჟები თავად ბოტასებზეა აღბეჭდილი, თუმცა, რეალურად ისინი სუბკულტურას გამოხატავენ — ადამიანებს ღამის ცხოვრების საზოგადოებიდან, განსაკუთრებით იმათ, ვინც კლუბ “ხიდზე” დადის და ვისთვისაც ეს სივრცე სახლადაა ქცეული. ნამუშევარში გამოყენებული შავი ქაღალდი მოგვაგონებს ამ კლუბის კედელს, სილუეტები — ადამიანებს. ნამუშევარი შექმნილია სარკისმიერი მასალისგან და შავი ქაღალდისგან, რომელთა ყოველი ზედაპირი დაჩხვლეტილია და ეს ადამიანის დაბურძგლას ირეკლავს. თუ დაბურძგლის ფიზიკურ ფენომენს ჩავუფიქრდებით, იმაზე შეთანხმება შეგვიძლია, რომ ის “გულწრფელობის მაჩვენებელია” — რაც არტისტისთვის ზუსტად რომ კლუბის სიმბოლოს წარმოადგენს.
კვარცხლბეკზე წარმოდგენილი კიდევ ერთი ნამუშევარი — ლეპტოპი — პანდემიის დროს ტექნოლოგიებისა და სოციალური მედიის მნიშვნელობაზეა. ინფორმაციის სწრაფმა გაცვლა-გამოცვლამ ახალი რესურსები და შესაძლებლობები გაგვიჩინა. ნამუშევარს ყვავილის ფორმა აქვს და თავად ბუნებისა და პლანეტის მნიშვნელობას გვახსენებს; ასევე იმას, რომ ჩვენ ამ ყველაფრის ნაწილი ვართ — ჩვენი გეომეტრია ეს ყვავილია — საიდუმლო ფრაქტალური გეომეტრია. 